1Cor 3 | KYG | STEP | Konaga'nimogitapae, hu'na, Nagaemo Goti Auneme'amo'mo hau'niya kava'mo akame nehaya vaya'aife'mo hapa nepauva agufa gemo hu'na lapa opai'nofa apakufamo'mo hau'niya kava'mo akame nehaya vaya'aife'mo hapa nepauva agufa gemo hu'na lapa pai'nove. Lapakaemo aise afina'mo Kalaisipi'mo mai'netapae'mo nute mafa'negana hutapa mai'nae.

1 Corinthians 3

Goti ali'ya'amo ne'aliya vaya'aife'mo apava gemo hu'niya gemae

1 Konaga'nimogitapae, hu'na, Nagaemo Goti Auneme'amo'mo hau'niya kava'mo akame nehaya vaya'aife'mo hapa nepauva agufa gemo hu'na lapa opai'nofa apakufamo'mo hau'niya kava'mo akame nehaya vaya'aife'mo hapa nepauva agufa gemo hu'na lapa pai'nove. Lapakaemo aise afina'mo Kalaisipi'mo mai'netapae'mo nute mafa'negana hutapa mai'nae. 2 Lapakaemo alopa vaya'mogi ne'naya agufa ne'ya'mo nesayafe'mo alo osutapa afa'a mai'nage'nae'mo nu'mo lapami'nove. Alo osutapa mai'netapae'mo hemeni'e'mo alo osutapa afa'age'mo mai'nae. 3 Lapakufamo'mo hau'niya kava'mo akame hu'nayanagetapa hemeni'e'mo afa'age'mo akame nehae. Lapakaitapifi'mo lapaipa kafa hapaege ge vaige alita fako hutapa alu vaya alu vaya'mo maige hutapa mai'netapae'mo lapakufamo'mo hau'niya kava'mo akame nehutapa ma mopafi vayakana hutapa ne'maiye. 4 Mago vaya'amogitapamo Polo vaya'amo mai'none, hutapa huge mago vaya'amogitapamo Apolosi vaya'amo mai'none, hutapa huge hutetapae'mo lapakufamo'mo hau'niya kava'mo akame nehae. 5 Polo'namo ina la'namo mai'nogeno Apolosi'a ina la'mo mai'niye. La'agaemo Goti ali'ya'amo ne'alu'a vekala'mo mai'no'agetapae'mo la'agaeteti'mo lapakesa afita fatago hu'nae. Ala kava ne'mo'a la'ami'niya ali'ya'amo ne'alu'ae. 6 Nagaemo avina ya'mo hakale male'nogeno'ae'mo Apolosi'a ani'mo laki'niya'monanafa Goti'a alino hageno ate'niye. 7 Avina ya'mo nehakaleya veka'e ani'mo nelakiya veka'e'mo ina agufa vekala'mo mai'na'a'monanafa Gotike'mo alino hageno ne'ateya vekamo ala agi vekamo mai'niye. 8 Avina ya'mo nehakalaya vaya'e ani'mo nelakiya vaya'mogi'e'mo magoke agufa ali'ya'mo ne'aliyanage'a haiya agufa kava'mo hu'a ali'ya'apimo ne'alisafige'a ani kava hu'a miya'apimo apamete apamete hu'a aligae. 9 La'agaemo Goti'e'mo lokaeta'a ali'ya'amo ne'alu'agetapae'mo lapakaemo Goti hoya'agana hutapa maige no'agana hutapa maige hutapa mai'nae.

10 Goti'a fiku naha maeno nami'nige'nae'mo hogoteno ageno alagepa hu'neno no'mo nekiya vekagana hu'na mai'ne'nae'mo fai'na ate'nova yate'mo mago alu vaya'mogimo no'mo nekiye. Muki'amogimo, haiya kava huta no'mo nekupi, hu'a age'ne'a alagepa hu'a yagai'a atesaya kava'mo hane'niye. 11 Yesu Kalaisi'a no'mo fai'a ne'ataya yafakana huno mai'nige'na fai'na ate'novanage'a mago alu yafate'mo no'mo fai'a atesaya yafa'mo ohane'niye. 12 Mago vaya'mogimo goli yafateti'mofi siluva yafateti'mofi alagepa yafateti'mofi hu'a alini'e'a fai'na ate'nova yafate'mo no'mo nekiye. Mago vaya'mogimo yosaleti'mofi hopaleti'mofi hi'yagofaleti'mofi hu'a alini'e'a no nekiye. 13 Kalaisi afina'mo afole aisige'apae'mo haiya kava hu'a no'mo ki'nisafigeno henaga'amo afole yate'mo alino afole aino ategaiye. Atamo lesiya afina'mo muki vaya'ai ali'ya'apimo alino apave ligiye. 14 Alini'e'a ki male'nisaya ya'mo olesige'apae'mo miya'apimo aligae. 15 Lesiya'mo'mo miya'apimo lageso hisige'a no'mo ki'naya vaya'mo lageso osu'a afa'a maigaya'monanafa no'amo nelegeno'ae'mo aeno akalo paetaleno aune heno u'niya vekagana hu'a maigae.

16 Lapakaemo magokepi lokaeta mai'netapae'mo Goti mono no'amo mai'nageno Goti Auneme'amo'mo lapakaepi'mo mai'niye, hutapa o'afi'nafiye. 17 Mago vekamo'mo Goti mono no'amo heno halagape vaino atalesigeno'ae'mo Goti'a alino ago'ya lagauno atalegaiye, Goti mono no'amo aote no'mo hane'niya'mofe'mae. Lapakaemo ani aote mono no'amo mai'nae. 18 Lapakaitapie'mo humi olapateyo. Lapakaepati'mo mago vekamo'a ma mopafi vaya'mogi afite'a age'naya agufa gemo afiteno'ae'mo, agete'na afi'nova vekamo mai'nove, huno agesamo ne'afisiyana ageteno afi'niya ge'amo ataleteno, negi vekamo mai'nove, huno hino. Huno hisiyana lama gele'mo ageteno afi'niya vekamo hamalegaiye. 19 Ma mopafi vaya'mogi afite'a age'naya kava'mo Goti aulagale'mo negi nagi kava'mo hane'niye. Ani kavatefe'mo Goti mukufi gemo'mo,Afite'a age'naya vaya'mogimo avame name kava'mo nehageno'ae'mo Goti'a ane'aifi'mo hegekana huno ne'apatafaiye, huno hu'niye. 20 Mago'e gemo Goti mukufi'mo hane'niya gemo'mo huno'ae'mo,Ala kava ne'mo'a afite'a age'naya vaya'mogi apakesa ne'afiya kava'mo ageteno'ae'mo, afa'a inagufa yane, huno nehiye, huno hu'niye. 21 Hu'niya'mofe'mo lapakaemo vaya'aife'mo amuse osiyo. Muki ya'e vaya'e'mo lapakaitapi ya'mo hane'niye. 22 Polo'agi Apolosi'agi Pita'agi ma mopagi ofali'a afa'a ne'maiya kavanagi nefaliya kavanagi hemeni afinanagi afole aisiya afinanagi muki ya'mogi huno lapakaitapi vaya'e ya'e'mo hane'niye. 23 Lapakaemo Kalaisi vaya'amo mai'nageno Kalaisi'a Goti veka'amo mai'niye.